O goberno local da Coruña aprobou este luns, en Xunta de Goberno local, a Axenda Urbana da Coruña 2030, con reproches de todos os grupos da oposición –PP, a Marea Atlántica e BNG– por entender que se deu luz verde a un documento “estratéxico” para a cidade pola “porta de atrás”, con “improvisación”, sen “consenso” e “furtando o debate”.
Estes foron os argumentos esgrimidos polos edís dos distintos grupos para quen se trata dunha cuestión que debía levarse a pleno, como si se fixo en cidades como Santiago ou Pontevedra, segundo expuxeron.
Con todo, o goberno municipal sostén que a aprobación en Xunta de Goberno local é “un trámite esixido desde o Goberno central, que non establece que o documento teña que ir a pleno”. No entanto, indica que se convocará a todos os grupos na correspondente comisión para “solicitar as súas achegas” e levalo a pleno. Sostén tamén que houbo no verán reunións con distintos colectivos nun “proceso participativo”.
Antes, en rolda de prensa, a edil do BNG Avia Veira cualificou de “insulto á cidadanía” que se lles dixese, desde o grupo socialista, que “non sabían ata a semana pasada que se tiña que aprobar este documento ata o 13 de setembro” e argumentou que a consultora encargada “xa o advertiu en xullo”.
Na mesma liña, manifestouse a portavoz da Marea Atlántica, María García, que insistiu en que se trata dun documento que “define o modelo de cidade” e un requisito para acceder a fondos europeos e que, por iso, esixe “o consenso necesario”. Tamén cuestionou o contido do aprobado por “falta de ambición”.
Pola súa banda, o concelleiro do PP Roberto Rodríguez reprochou que non se dese “opción” a participar no mesmo á oposición e asegurou que desde o Goberno “obrígase aos concellos a xustificar por que non leva a pleno” se non se fai.
“Cal é a escusa de mal estudante que vai pór Inés Rei esta vez”, dixo sobre a alcaldesa, á que acusou de “non cumprir” os acordos coa oposición.
“Se o Ministerio –o de Transportes, Mobilidade e Axenda Urbana– dá por ben que estea aprobada en Xunta de Goberno local non haberá problema con esa subvención”. “Se o Ministerio non entende por xustificada ese incumprimento se cadra temos que pagalo entre todos”, apuntou, na mesma liña, Avia Veira sobre os efectos en subvencións europeas.
