O Concello da Coruña organiza actividades formativas e actuacións musicais en rúas peonís, ademais de promover melloras de accesibilidade, con motivo da Semana Europea da Mobilidade.

Así o informou o concelleiro de Urbanismo, Vivenda, Infraestruturas e Mobilidade, Francisco Díaz Galego, na presentación dunhas iniciativas que terán lugar entre este venres, día 16, e o 22 de setembro con actos en varios puntos da cidade.

O obxectivo, segundo explicou, o edil, será “concienciar á cidadanía sobre a mobilidade sustentable, a educación viaria, a accesibilidade universal e a necesidade de adoptar novos hábitos neste campo”.

Díaz Galego sostivo, ademais, que, ao final do mandato, “gañaranse máis de 55.000 metros cadrados para a cidadanía, a través da creación de espazos sustentables, saudables e seguros”.