O deputado do BNG no Congreso Néstor Rego e o portavoz municipal e candidato nacionalista á Alcaldía da Coruña, Francisco Jorquera, informaron das máis de 30 emendas rexistradas pola formación nacionalista respecto dos Orzamentos Xerais do Estado de 2023 para a comarca e cidade herculina por un importe total de máis de 260 millóns de euros.

A organización nacionalista anunciou este venres que focalizará a negociación no incremento dos investimentos en infraestruturas –sobre todo en materia ferroviaria coa modernización de liñas e a implantación de proximidade– e servizos.

Demandan, ademais, a implicación do Goberno na reforma de instalacións e edificios de titularidade estatal para impulsar A Coruña e dotala de mellores servizos. Rego afirmou que os orzamentos previstos para Galicia para 2023 son “insuficientes” e presentan “estancamento” respecto de anos anteriores mentres crecen os investimentos “na maior parte das comunidades”.

Unha situación “agravada”, segundo destacou, polo feito de que as contías non están a ser executadas na súa totalidade. “É unha fraude á cidadanía que uno de cada tres euros quede sen executar, son datos de 2021”, puntualizou.