O porto da Coruña anotou unha nova suba na súa estatística mensual, o que eleva xa o incremento no acumulado anual dende xaneiro ata novembro ao 26,3 por cento, segundo informa a Autoridade Portuaria.

Nun comunicado, explica que, en total, e a falta dun mes para o peche do exercicio, as mercadorías movidas ascenden a 13,3 millóns de toneladas, fronte aos 10,5 millóns correspondentes á estatística do mesmo período de 2021. En tráfico comercial soben todos os sectores: graneis líquidos, sólidos e mercadoría xeral.

Especialmente, incide no incremento rexistrado en graneis sólidos, que se achega ao 80 %, con máis de 4,6 millóns de toneladas movidas fronte aos 2,6 millóns do pasado ano.

“Estes resultados débense ao notable crecemento dos tráficos do porto exterior e a súa consolidación en graneis agroalimentarios, así como o seu posicionamento como nodo estratéxico no intercambio de mercadorías, aproveitando os cambios na organización das cadeas loxísticas globais”, engade.