A alcaldesa da Coruña, Inés Rey, anunciou, tras a Xunta de Goberno local, a aprobación dun acordo para que o concello adquira a coñecida como ‘casa da Sinagoga’ polo seu valor histórico, de forma que pase a ser de titularidade municipal.

“Porque falamos dun inmoble que é testemuño dunha arquitectura que pode documentarse entre os séculos XVI e XVIII, o Concello puxo todo o seu empeño en adquirilo”, expuxo.

Por outra banda, a Xunta de Goberno local autorizou este mércores a expropiación, de mutuo acordo coas persoas propietarias, dunha parcela na rúa San Diego, que permitirá incrementar os espazos de lecer no barrio da Gaiteira.

Entre outros asuntos, aprobouse tamén a firma dun novo convenio no contexto do proxecto Conecta Coruña, que permitirá a instalación de sensores intelixentes no Hospital San Rafael.