A alcaldesa da Coruña, Inés Rey, destacou, na recepción de Nadal, a consecución da Axencia Española de Supervisión de Intelixencia Artificial (Aesia) como un “triunfo colectivo”. Tamén sinalou que neste mandato a cidade “recuperou a ambición en 2022”.

Rey, que fixo balance do ano que termina, puxo en valor a aposta polo diálogo e o acordo para a consecución de demandas “históricas” para a cidade como o tren ao porto exterior, a intermodal ou a ampliación do complexo hospitalario.

“Asuntos cruciais que se van desbloqueando e facendo de novo da Coruña unha cidade atractiva para o investimento”, expuxo ante os asistentes. No acto, repasou tamén as principais actuacións levadas a cabo nos barrios para a recuperación de espazos para a cidadanía, como a rolda peonil ou as políticas a favorde unha mobilidade máis sustentable.