O PP e a Marea Atlántica reclamaron ao goberno local da Coruña unha solución ao futuro dos peiraos, cuestión que os edís da Marea levarán a pleno cunha proposta.

“Chámame moito a atención o costume da alcaldesa de crear un problema e nunca dar unha solución, fai bastante máis dun ano a Xunta fixo unha proposta e Inés Rey fixo unha contraproposta que foi aceptada por todas as partes”.

“Pasou un ano e uns meses e atopámonos agora con que hai uns días, cambiou de opinión”, argumentou sobre a postura municipal de non pagar polos peiraos de Batería e Calvo Sotelo.

Por outra banda, dixo que “se a alcaldesa presionase ao goberno do Estado para que condonara a débeda, igual que fixo en Valencia, hoxe non teriamos este problema”, sentenciou.

Mentres, a Marea Atlántica levará a pleno unha moción sobre este asunto, segundo informaron a súa portavoz municipal, María García, e o seu candidato á Alcaldía, Xan Xove.

Na moción, proponse unha folla de ruta para integrar o bordo litoral na cidade. “Queremos que todos os grupos políticos mostren as súas posicións e voten de maneira clara para confirmar que existe unha maioría disposta a gañar o porto“, asegurou Xove.

En concreto, a proposta da Marea expón a creación dun consorcio público entre o Concello, a Autoridade Portuaria, a Xunta e o Estado para xestionar eses espazos. “Hai que ir máis aló, toda a corporación e todos os veciños deben de ter espazo para colaborar no que vai ser a maior transformación urbana da Coruña e non pode quedar en mans dun goberno en minoría”, expuxeron.