O poeta de Mazaricos Ismael Ramos, galardoado recentemente co Premio Nacional de Poesía Joven Miguel Hernández pola súa obra ‘Lixeiro’, será o protagonista da primeira sesión de “Terceiro tempo”, un novo ciclo que pon en marcha o Café Universal da Coruña en colaboración coa revista VINTE e coa libraría Lume, tamén da cidade.

O eterno café herculino, situado na Estreita de San Andrés e rexentado por Xulio Vázquez, trae a poesía “á calor do amor dun bar”.
As sesións celebraranse o último xoves de cada mes ás 21h con diferentes poetas do ámbito galego. A primeira conversa conducida pola polifacética María Yáñez este xoves 26 ás 21h, falando dende como é medrar nunha taberna, dos bares da Coruña, do Superdépor, do Tinder ou do primeiro tren da mañá Coruña – Vigo.