A alcaldesa da Coruña, Inés Rey, volveu a instar á Xunta a declarar Ben de Interese Cultural (BIC) a Casa Cornide, propiedade dos Franco e que o consistorio herculino pretende reclamar para o patrimonio público.

Fíxoo ao ser preguntada pola demanda xudicial que o goberno local anunciou que presentaría. “Díxose que se interporía e así se fará”, insistiu.

Rey volveu a pedir á Xunta que “axilice” os trámites necesarios “para a protección do inmoble e o seu contido”. “E non se dilate máis o procedemento, sabemos que están en prazo pero gustaríanos que non o esgotasen”.

Respecto desta cuestión, a Xunta argumenta que a Casa Cornide “goza da máxima protección patrimonial desde 2021” despois de que iniciase o expediente BIC en maio dese ano, aínda que lembra que aínda que sexa ben de interese cultural iso “non impide que poida venderse”.