Este mércores, 8 de febreiro, ás 20:15 h, a Asociación veciñal, cultural, deportiva e recreativa do barrio da Agra do Orzán “AGRA” estrea o programa Agra no Ágora de 2023. Faino coa obra “As fillas Bravas de Momán”, da compañía teatral Chévere, nun novo festival de artes escénicas para o mes de febreiro no auditorio do Centro Ágora.

AS FILLAS BRAVAS son tres mulleres que tocan e cantan o que lles peta como antes fixeron a súa nai e a nai da súa nai; viven en Momán, unha aldea que representa todas as aldeas e na que todo é posible. Elas veñen para reafirmar modelos de muller vencellados a expresións culturais tradicionais que agochan berros emancipatorios e cantos de rebeldía insospeitados, valorizando a participación das mulleres na construción dunha memoria e dunha identidade colectiva.

Todas as actividades de “Agra no Ágora” son de acceso libre e gratuíto; o programa está financiado polo Concello da Coruña e deseñado en colaboración coa Asociación veciñal Agra. Non é preciso reservar entrada; as localidades vanse ocupando por orde de chegada. Cómpre chegar con antelación porque ás 20:15h pecharanse as portas do auditorio.