Letrados da Administración de Xustiza estiman que en Galicia se concluirá a semana cuns 6.000 sinalamentos suspendidos pola folga indefinida que convocaron o pasado 24 de xaneiro para reclamar unha “adecuación salarial”.
Así o expuxo Fernando Santiso, representante da Unión Progresista de Secretarios Xudiciais, durante a concentración que letrados de xustiza da área da Coruña convocaron ante a Delegación do Goberno en Galicia.
Fixérono varias decenas de representantes deste colectivo e cunha pancarta na que se podía ler ‘Xustiza, por dignidade, por igualdade’. Foi ante as portas da Delegación do Goberno en Galicia a cuxo máximo representante, José Miñones, solicitarán unha entrevista. En declaracións aos medios, Fernando Santiso destacou que o seguimento en Galicia está a ser “moi bo”, ao redor dun 70% de media que no caso da provincia da Coruña, precisou, alcanza “case o 80%”.
“O que máis desgasta é o sentimento de responsabilidade“, asegurou en referencia ao “dano” na cidadanía da folga polo número de xuízos e vistas sen celebrar, ao que sumou outro tipo de trámites. Así, indicou que só no partido xudicial da Coruña son “máis de 6.000 demandas pendentes de tramitar nos xulgados e máis de 20.000 ecritos pendentes”, citou como exemplo da situación que se está rexistrando noutros xulgados galegos.
Con todo, e de cara á reunión convocada co Ministerio de Xustiza, afirmou, en liña con outros letrados xudiciais, que esperan que se acheguen posturas e que “isto termine canto antes”. “O acordo é fácil”, dixo remitíndose ao pactado o pasado mes de abril en resposta ás súas demandas. E é que tanto este representante como outros letrados da Administración de Xustiza incidiron en que as reivindicacións non son “novas”, aludindo ao citado acordo de abril, polo que se mostraron confiados en que poida haber un achegamento de posturas.
Mentres, no caso da Coruña, anunciaron unha nova concentración o venres, ás 11,00 horas no Obelisco, onde doarán tamén sangue atendendo ao chamamento da Axencia Galega de Doazón de Órganos e Sangue.
