O Sergas incorporou 16 novos profesionais de enfermaría á Atención Primaria da área sanitaria da Coruña e Cee, co que o número de profesionais elévase a 339 nos centros de saúde.

As novas prazas son tanto de estabilización como de nova creación. En concreto, oito van destinados a Puntos de Atención Continuada e outro oito a diferentes centros de saúde.

Sobre este anuncio, a Comisión de Atención Primaria da área sanitaria cualificou de “insuficiente” a citada contratación, ademais de demandar un incremento de profesionais de todas as categorías.

“A incorporación deste número de enfermeiras e enfermeiros para os máis de 70 centros de saúde e PACs que ten esta área non soluciona o problema de sobrecarga de traballo“, apostila.