Galicia rexistrou un total de 14.556 nacementos en 2022, o que supón 231 menos que en 2021 (-1,56%), segundo os datos de estimación mensual de alumeamentos que publica o Instituto Nacional de Estatística (INE) este mércores. Unha situación que tamén sofre a provioncia da Coruña.

No entanto, o ritmo de caída de nacementos de Galicia en 2022 é menor ao 3% de descenso acumulado no ano 2021. Así mesmo, o 1,56% de descenso é lixeiramente inferior ao ritmo de retroceso na media española (-2,08%).

Lugo é a única provincia galega na que hai un incremento, pasa de 1.622 bebés nados en 2021 a 1.740 en 2022. Con todo, o resto de provincias computan unha baixada: A Coruña (pasa de 6.318 en 2021 a 6.239 en 2022), Pontevedra (de 5.448 a 5.253) e Ourense (de 1.399 a 1.323).

No tocante só ao mes de decembro, naceron 1.189 nenos en Galicia, o que se traduce en 52 menos que un ano antes, segundo os datos do INE.

AUMENTO DE NAIS DE MÁIS DE 40 ANOS

Por idades das nais, obsérvase un incremento entre as maiores de 40 anos, foron 2.202, 69 máis que as 2.133 dun ano antes.

O grupo de idade máis grande entre as nais en 2022 é o de 35 a 39 anos (4.877), seguida de 30 a 34 anos (4.472). Houbo dúas nais de menos de 15 anos e un total 12 de 50 anos ou máis.