O candidato do BNG á Alcaldía da Coruña, Francisco Jorquera, presentou aos 14 integrantes da lista electoral da formación nacionalista para concorrer nas próximas eleccións municipais cunha presenza “moi relevante de persoas novas e sobradamente preparadas” e cun perfil profesional “moi variado” que aspiran a “reter o talento” na cidade herculina.
O Bloque utilizou o lema ‘orde e talento’, que son os rasgos que deben caracterizar a un bo equipo de fútbol, segundo Arsenio Iglesia. “Eses son os rasgos que caracterizan a lista do BNG e son as cualidades da candidatura”, dixo o portavoz do Bloque no concello. Segundo sinalou, a formación nacionalista achegou “solidez, solvencia e fiabilidade” a un mandato caracterizado pola “inestabilidade” do goberno local e as “crises e recomposicións” dos outros grupos municipais.
Jorquera insistiu en que conta cun equipo que achega “capacidade, empatía, ideas, enerxía e ambición” para dar resposta ás necesidades dos veciños.
APOSTA POLOS BARRIOS
Respecto das liñas “mestras” do programa, o líder nacionalista sinalou como “eixo fundamental” a aposta por un plan de rexeneración para investir o proceso de degradación dos barrios. “A Coruña é unha cidade de barrios e queremos pór os barrios no centro”, apostilou.
Por outra banda, Jorquera anunciou que o próximo 9 de marzo celebrarase no Palacio de Congresos e Exposicións (Palexco) un acto social de presentación “moi potente” que contará coa portavoz nacional do BNG, Ana Pontón.
