O Sindicato Labrego Galego fixo un chamamento a participar na concentración convocada o vindeiro sábado ante a sede Delegación do Goberno en Galicia –na Coruña– en apoio a Miguel Abraira, veciño do concello coruñés de Miño en folga de fame por atrasos na concesión dunha licenza municipal para a construción dunha vivenda no mesmo lugar onde “desde hai anos” ten un centro de transformación de alimentos.

Nun comunicado, o SLG trasladou o seu apoio ao activista, ligado á organización agraria, que se atopa en folga de fame ante a Delegación de Goberno desde o 25 de febreiro para demandar o desbloqueo da situación administrativa do seu trámite para obter unha licenza solicitada no ano 2019.

“Un medio rural vivo necesita iniciativas económicas que permitan asentar poboación nestas áreas, e de forma diferenciada naquelas zonas especialmente deprimidas”, denunciou o SLG, que acusa o Concello de Miño de tramitar con “facilidades e celeridade” as licenzas de “poderosas” construtoras como Fadesa mentres “vai en contra dos intereses dos propios habitantes de Miño”.