O Concello da Coruña aprobou, en Xunta de Goberno local, a modificación puntual da ordenanza municipal para a protección e tenencia de animais para actualizar cuestións relativas á salubridade e actualizar as sancións por infraccións. “Duplicamos practicamente o importe das sancións”, explicou a alcaldesa, Inés Rey, na comparecencia posterior ante os medios de comunicación.

A rexedora sinalou que a actual ordenanza é do ano 1997 e o obxectivo é adaptala á normativa vixente “co propósito de mellorar a convivencia”. Neste sentido, Rey destacou que, entre outras cuestións, as persoas que paseen cos seus cans “deberán levar consigo unha botella para limpar ouriños“. No caso de infraccións leves, como non recoller os excrementos, estarán entre 100 e 500 euros fronte a 30 e 300 euros de ata a data.

Ademais, avanzou a inclusión da cala de Bens como praia canina durante todo o ano e a saída a licitación do servizo de recollida, transporte, mantemento e residencia de animais domésticos da cidade, centralizado no centro municipal de animais domésticos de Bens.