Este xoves, A Parva, o agarimosa cantina do mercado de San Agustín, recibía a presenza de representantes das comunidades afectadas polos derrames de petróleo que se produciron en xaneiro de 2022 no mar do Perú, dos que foi responsable Relapasaa, subsidiaria do Grupo Repsol.
Non escatimaron en adxectivos na súa conversa con varios representantes do sector local da pesca, denunciando que a vertedura, que afecta a 10.300 persoas empadroadas e máis as súas familias, chega afectar a unhas 51.500 persoas, directamente prexudicadas na súa actividade laboral e na súa vida.
“En Perú, a máis dun ano do derrame da empresa Repsol, seguimos a ter mareas tóxicas que acaban con todo e impiden a pesca, mesmo a día de hoxe”, alertou Zenón Gallegos Ferrel, pescador artesanal e presidente da Asociación Sindicato de Pescadores Artesanais do Porto de Chancay. Xunto con el conforma a comitiva en xira #RepsolHazteCargo, que leva percorrendo o país co apoio da asociación Entrepobos, o pescador artesanal e presidente da Asociación de pescadores artesanais do distrito de Aucallama (Apada) Luís Antonio Díaz Barroso e o sociólogo Alejandro Chirinos, experto na dinámica mariño-costeira, especialista en políticas públicas, xestión azul e conservación mariña e director executivo da ONG peruana CooperAcción.
”O impacto ambiental xerado abarca aproximadamente 11.600 hectáreas, comprendendo 48 praias e 2 áreas naturais protexidas: a Reserva Nacional Sistema de Illas, Illotes e Puntas Guaneras e a Zona Reservada de Ancón.” Segundo a Defensoría do Pobo de Perú, morreron preto de 900 especies animais. Entre elas, especies vulnerables ou en perigo de extinción, como o lobo mariño chusco e o zarcillo, o pingüín de Humboldt e a londra mariña.
“O que estamos a facer é tentar preservar a nosa forma de vida, o traballo que nos aprenderon os nosos pais e os nosos avós” manifestou Díaz Barroso. Na mesma liña, Alejandro Chirinos quixo poñer de relevo o papel das mulleres na sostibilidade da pesca artesanal peruana “a que máis emprego xera dentro do sector e a máis afectada polo derrame”.
