A Coruña conta con máis dun centenar de símbolos franquistas sen eliminar, segundo un estudo realizado polo sociólogo e vítima do franquismo, Manuel Monge, presentado nun acto na Agrupación Alexandre Bóveda, xunto á súa presidenta, María Xosé Bravo.

En concreto, cifrou en 141 os símbolos franquistas existentes na cidade, á vez que expuxo diferentes propostas para un programa de goberno nesta materia, ante a convocatoria das próximas eleccións municipais.

O informe, que será entregado á alcaldesa, Inés Rey, e a todos os grupos municipais, recolle unha relación de 141 símbolos franquistas na cidade, coa “xustificación” da súa eliminación.

Son 30 rúas, 21 retratos, 28 distincións honoríficas; 44 monumentos, placas e escudos; 14 símbolos franquistas en dependencias do Ministerio de Defensa e catro en centros de ensino. Tamén alude aos retratos de catro golpistas no consistorio.

“Nalgúns concellos isto xa está superado, non queda nin rastro”, recalcou Monge, quen denunciou un “incumprimento” da Lei de Memoria Democrática. Por outra banda, manifestou que no seu informe hai máis de 40 propostas de actuación.