O goberno municipal da Coruña aprobou, de forma inicial, o estudo de detalle para a ordenación de volumes da torre polivalente do ‘Novo Chuac’, que, ademais de acoller o futuro hotel de pacientes, tamén concentrará os servizos de administración e xestión da área sanitaria coruñesa.
A aprobación deste estudo de detalle chega despois de que a área municipal de Urbanismo emitise informe favorable á documentación técnica presentada pola Consellería de Infraestruturas, posibilitando a construción desta torre polivalente, de 16 alturas, na parcela que ten asignada. O estudo de detalle será sometido a información pública polo prazo dun mes.
En rolda de prensa, tras a Xunta de Goberno local, a alcaldesa herculina, Inés Rey, asegurou que con iso se mostra o “compromiso” do goberno municipal “coa folla de ruta trazada para a consecución do ‘Novo Chuac’. Tamén dixo que o obxectivo municipal é que as obras comecen antes de terminar o ano e engadiu que, por ese motivo, se dá “outro paso adiante”.
Noutra orde de cousas, a Xunta de Goberno local deu luz verde ao proxecto para acometer melloras de accesibilidade en 16 paradas de autobús localizadas nos barrios de Castrillón, Os Rosales, Labañou, Monte Alto e a contorna dos Mallos e Catro Camiños.
