A sección cuarta da Sala do Contencioso-administrativo do Tribunal Superior de Xustiza de Galicia (TSXG) descartou que a Real Sociedade Deportiva Hípica da Coruña estea exenta de pagar o Imposto sobre Bens Inmobles (IBI) dos exercicios 2019 e 2020, que ascende a 29.547 euros.

Os maxistrados rexeitaron nunha sentenza a anulación das liquidacións do gravame que solicita a entidade, a cal defende que os terreos e instalacións nas que desenvolve actividades deportivas e recreativas cumpren o requisito de afección á defensa nacional e, por tanto, entende que están libres do pago.

O TSXG subliña, con todo, que o destinatario desas actividades “non é o persoal militar, nin de forma exclusiva nin con carácter preferente, senón a sociedade civil”. Así, destaca que a finalidade que cumpren as instalacións é “facilitar aos socios a práctica da equitación e outros deportes, e proporcionarlles festas, distraccións e comodidades propias dos centros de reunión da súa categoría”.

Por iso, recalca que para que a afectación á defensa nacional exista, para os efectos de aplicar a exención tributaria solicitada pola Hípica, debe de existir “”unha vinculación dos inmobles ou terreos a actividades destinadas, senón de forma exclusiva, si polo menos de forma prioritaria ao persoal militar ou os seus familiares”.