O Diario Oficial de Galicia (DOG) publicou este luns o acordo polo que se inicia o procedemento para a modificación dos límites do monumento natural Costa de Dexo, en Oleiros e para a elaboración do seu plan de xestión.

A Consellería de Medio Ambiente, Territorio e Vivenda sinala que a costa de Dexo representa unha “fronte costeira aberto entre as rías da Coruña e de Ares e Betanzos, cunha importante extensión de cantís mariños, illotes, vexetación de herbas e matogueiras costeiras en bo estado de conservación, de gran importancia ecolóxica tanto pola singularidade dos seus ecosistemas e hábitats como polo súa xeomorfoloxía e alto valor paisaxístico”.

Este espazo de 266,76 hectáreas de superficie foi declarado monumento natural mediante o decreto 101/2000, do 31 de marzo, que establece que os seus límites xeográficos correspóndense cos do espazo definido na Ordenanza 12 de conservación e protección das costas e praias do Plan xeral de ordenación urbana do Concello de Oleiros.

Segundo figura no DOG esta ordenanza “actualmente está derrogada” e por tanto é “necesario” modificar a normativa e “establecer os límites do monumento natural, aproveitando para realizar unha delimitación máis precisa do espazo”.

O plan de xestión, engade, establecerá “o réxime de usos e actividades permisibles”, así como “as limitacións que se consideren necesarias” para a conservación destes espazos, xunto coas medidas para a conservación dos hábitats e das especies. A súa tramitación, indica, corresponde á consellería competente en materia de conservación do patrimonio natural.

O acordo que recolle a resolución do departamento autonómico no DOG inclúe iniciar o procedemento para a modificación do artigo polo que se declara monumento natural á conta de Dexo, a elaboración do seu plan de xestión e do anteproxecto do decreto polo que se aproba devandito plan e encomendar a súa tramitación á Dirección Xeral de Patrimonio Natural.