Hoxe luns 24 de abril o Ágora acolle, dentro do ciclo Poetas di(n)versos, un recital de Diana Varela Puñal e Khedija Gadhoum. A partir das 20:00h, o auditorio reunirá a poeta, tradutora e profesora tunesina –especialista en letras iberoamericanas– @khedijagadhoum, a carón da poeta e avogada nacida en Corme, Diana Varela Puñal, actual secretaria xeral da Asociación Escritoras-es Lingua Galega.

A primeira está a piques de publicar “Nuevas Voces de Sheherazade: Poesía contemporánea de Mujeres del Magreb”, pois traduce do árabe ao castelán, tanto como do inglés ao castelán e viceversa, e tense ocupado de poetas de moi diversas procedencias.

A cormelá co-dirixe a editorial galega especializada en poesía Medulia Editorial e nese terreo levou premios coma o Díaz Xácome ou o Uxío Novoneyra, mais é tamén autora de pezas teatrais tanto para público adulto coma infantil.

Máis citas

O ciclo continúa o vindeiro luns 29 de maio con Susan Briante e Daniel Salgado, e o 5 de xuño con Eduardo Mitre e Domingo Tabuyo.