Tal como comeza a ser tradición, o último xoves de mes, 27 de abril ás 20:00, na Taberna Lume e Ferro, terá lugar o 3º dos eventos que conforman o Poetry Slam Carral 2023.
Os únicos requisitos que se precisan para participar no evento son os de ter un poema orixinal de creación propia e que este se poida recitar nun límite de 3 minutos, sen que a persoa que recite leve ningún tipo de disfraz nin artefacto. O xurado, composto por membros do público que asista, elixirá o gañador ou gañadora deste primeiro encontro que estará clasificado para a grande final que pechará esta primeira tempada do Poestry Slam Carral.
O gañador ou gañadora desta edición, unirase a Lugía Ugarte (@debajodelapalmera) e a Alba Rodríguez García, na gran final que se realizará en setembro. Esta última, como gañadora do anterior evento, actuará en calidade de poeta de calibraxe.
Nesta ocasión, o acto contará coa actuación especial de Samuel L. París que compartirá cos asistentes a súa poesía. Samuel L. París, ademais de ser un poeta con multitude de obra publicada e tamén distribuída a través do seu blog pararaparis.wordpress.com), dirixe e presenta o programa “A Catapulta” en colaboración con O Salto Galiza e El Salto, no que conversa con poetas e persoas relacionadas co mundo da poesía e que se pode seguir a través de Twitch e de Youtube.
As prazas para apuntarse a este evento xa están cubertas, pero segue aberta a lista de agarda a través do correo: aeclacrar1@gmail.com. As persoas que formen parte desta lista de agarda terán prioridade para inscribirse no seguinte evento que terá lugar o próximo 25 de maio.
