A subdelegada do Goberno na Coruña, María Rivas, supervisou, no Banco de Alimentos Rías Altas, a primeira fase da entrega de alimentos que o Goberno fai ás persoas máis vulnerables a través do Programa de Axuda Alimentaria do Ministerio de Agricultura.
Nesta primeira fase, segundo adiantou Rivas, na provincia da Coruña repartiranse máis de 196.000 quilos de alimentos por valor de 325.000 euros. No conxunto de Galicia, serán 700.000 quilos por valor de 1,14 millóns de euros. Todos os alimentos deposítanse en centros de distribución habilitados dos que hai un total de nove en toda Galicia e tres na Coruña.
Estes almacéns son xestionados pola Federación de Bancos de Alimentos e Cruz Vermella Española, que son as organizacións de distribución seleccionadas polo Ministerio de Agricultura na comunidade galega.
Nesta primeira fase, aproximadamente a metade do que se consigna para a provincia da Coruña xestiónao o Banco de Alimentos Rías Altas. No almacén da Coruña están dispoñibles 63.877 quilos e no de Santiago, 34.393 quilos. O resto dos alimentos están xestionados por Cruz Vermella.
