Medio cento de centros educativos enchen Santa Margarida para celebrar o Día da Ciencia na Rúa. Alumnado e profesorado de 48 centros educativos de diversas localidades galegas (Coruña, Betanzos, Culleredo, Ribadeo, Cambre, Carral, Coristanco, Ortigueira, Arteixo, Miño, Arzúa, Pontedeume, As Pontes, Outes, Zas, Poio, Oleiros e Cerceda) trouxeron este sábado ducias de actividades e experiencias que prepararon durante meses para convidar a cidadanía a descubrir, aprender e xogar coa ciencia e a tecnoloxía.
Durante todo o día, alumnos e alumnas amosarán á cidadanía os seus proxectos científicos. Ademais, houbo diferentes actividades paralelas, como a actuación da Banda Municipal de Música da Coruña na escalinata da Casa das Ciencias.
Os museos científicos son este sábado de acceso gratuíto. No caso do Aquarium Finisterrae, era necesario retirar previamente uns convites que xa están esgotados. A entrada á Domus e Casa das Ciencias é libre e no que vai de xornada rexistrouse un alto número de visitas.
