O 25 de maio de 1963, ás 12,30 horas, inaugurouse o aeroporto de Alvedro, na Coruña, coa aterraxe dun avión de Aviaco — filial entón de Iberia–, segundo lembra a compañía.

Nun comunicado, subliña que se tratou dun voo procedente de Madrid, no que ían un total de 44 pasaxeiros, aos que se sumaban seis tripulantes.

A compañía aérea lembra que naquel momento ofrecía tres voos á semana entre a capital e a cidade herculina e que ese ano pasaron polo aeroporto coruñés 8.500 pasaxeiros.

Agora, remarca en relación á situación en maio, Iberia conta con 28 frecuencias semanais entre A Coruña e Madrid que, segundo avanza, “incrementaranse ata un total de 31 en xuño”.