O home detido na Coruña pola morte dunha octoxenaria o pasado 5 de maio na rúa Parque, da cidade herculina, era un coñecido da vítima, segundo informa a Xefatura Superior de Policía de Galicia.

Trátase dun home de 35 anos residente na cidade herculina desde hai varios anos e que está investigado por asasinato e roubo con violencia. Tras o seu pase a disposición xudicial, decretouse por parte do xulgado o seu ingreso en prisión, comunicada e sen fianza, precisou o Tribunal Superior de Xustiza de Galicia (TSXG).

A Policía explica que a investigación levada a cabo permitiu esclarecer elementos que vinculan ao detido co crime. A vítima, de 87 anos, residía soa na vivenda e coñecía con anterioridade ao autor, segundo as citadas investigacións.

E é que na vivenda non se apreciou desorde pero si a falta dalgúns obxectos de valor. Sobre o detido, sinala, ademais, que realizara nos últimos tempos actividades “que lle facilitarían coñecer á vítima e mesmo a distribución da propia vivenda”.

Unha vez obtidas as probas que o vinculasen como presunto autor do feito, levou a cabo o martes a detención, procedendo tamén ao rexistro no seu domicilio.