O colectivo literario In Nave Civitas Lugrís mobilízase este xoves día 25 ás 19,30 horas na rúa Olmos para reivindicar a intervención “inmediata” do Concello da Coruña e da Xunta para a “protección e rescate” dos frescos que Urbano Lugrís pintou no inmoble do número 25.
A asociación denuncia que o consistorio non adoptou “ningunha medida efectiva” para evitar o empeoramento do estado dos frescos das paredes do antigo restaurante Fornos.
Respecto da Dirección Xeral de Patrimonio Cultural, a entidade critica que “non foi capaz nin de incoar” o expediente para a declaración como Ben de Interese Cultural (BIC) dos 12 murais do artista.
In Nave Civitas convoca á cidadanía a participar esta xornada na concentración vestidos con “camisetas de raias” para corear consignas como ‘Pena que Lugrís non fose de París’ ou ‘Nin cubismo, nin surrealismo, o mellor é o lugrismo’.
