Dende hai unha semana non fai máis que medrar o número de afectados por un brote de gastroenterite en Betanzos. Ante este aumento a Consellería de Sanidade solicitou ao Concello de Betanzos que restrinxa o uso da auga do abastecemento para que non se utilice para a inxesta (bebida ou preparación de comida), lavado de alimentos ou hixiene bucodental.

Faino no contexto do brote de posible orixe hídrica e co fin de “reducir ou eliminar potenciais riscos para a saúde da poboación”, explica o consistorio tras trasladarlle Sanidade esta cuestión.

Ademais, explica que non se pode descartar nas primeiras investigacións do brote “a implicación doutras instalacións como as fontes públicas non conectadas á rede municipal” polo que tamén se restrinxe o seu uso.

Esta comunicación trasladouse ao consistorio á espera de contar cos resultados das analíticas que está a elaborar, despois de recoller tomas en distintos puntos durante o día de onte.

O consistorio indica que a empresa concesionaria segue realizando un seguimento e durante a tarde coñeceranse os resultados das mostras recollidas o luns. As recollidas o domingo están, engade, “dentro dos parámetros esixidos”.