O xurado do concurso de ideas convocado para definir o novo centro de Santa Lucía, na Coruña, elixiu a proposta do estudo Burgos & Garrido entre as 14 iniciativas presentadas. Os gañadores redactarán o proxecto de execución e asumirán a dirección da obra para a remodelación do recinto.

Segundo precisa o Concello da Coruña, o estudo ten un prazo de catro meses para as presentacións dos proxectos básicos e de execución.

O novo centro de Santa Lucía compatibilizará nun só espazo tres usos diferentes, con accesos diferenciados; centro de saúde, centro cívico e mercado municipal.

Das 14 propostas presentadas, o xurado puxo en valor a de Burgos & Garrido pola súa aposta pola eficiencia enerxética do inmoble, así como a redistribución dos espazos interiores para aproveitar a luminosidade natural da contorna. Todo iso, explica o consistorio, “mantendo o espírito lixeiro e industrial que inspirou a antiga estrutura do recinto”, obra de Manuel Gallego Jorreto.