Estamos acostumados a recrear a historia das cidades mediante fotografías antigas e a nosa imaxinación, pero co auxe das tecnoloxías, xa é posible ir máis alá e recrear escenarios do pasado dunha maneira máis realista e visual. Un exemplo disto é a ‘Estación Visual A Coruña‘, un proxecto de reconstrución virtual da historia do territorio da cidade dende hai 350.000 anos.
‘Estación Visual A Coruña’ é un proxecto erguido grazas a un crowdfunding levado a cabo o pasado ano. O traballo contou e conta, ademais da súa documentación, cun esencial asesoramento especializado nas diversas áreas que abrangue, principalmente Arqueoloxía, Xeología e Historia.
Ademais da recreación virtual, a recolecta de cartos tamén axudou a acabar de crear o libro ‘A Coruña Eterna. Historia Visual I’, que contou con participación e prólogo do Profesor emérito Juan Ramón Vidal Romaní, no campo da Xeoloxía, e tamén con prólogo do arqueólogo Xosé María Bello Diéguez. O libro foi presentado o pasado mes de febreiro polo Reitor da UDC Julio Abalde Alonso e xa case esgotou a súa primeira edición.
Traemos unha novidade especial 💥😃
A cidade da Coruña como nunca a viches! Sacamos a voar o dron da Estación VIsual Coruña sobre a cidade desde hai 300.000 anos.
Esperamos que desfrutedes a viaxe!! 🕚🕙🚀#Coruña #Galicia #Cultura #Historia #Ciencia pic.twitter.com/yzE7FWOgDA
— EstacionVisualCoruña (@EVCoruna) July 13, 2023
O traballo, realizado por un equipo veterano en proxectos creativos e culturais, buscou crear unha representación o máis plausible e rigorosa posible pero que puidese ser accesible para todos os públicos.
O resultado deste traballo abre un amplo ábano de aplicacións. Estas poden servir para o ámbito educativo, o cultural, o científico ou o turístico. Tamén tería efectos na imaxe de marca da cidade, que ten a Torre de Hércules e a súa historia como un dos símbolos principais. “A Torre marca un dos eixos narrativos máis importantes da iniciativa, como non podería ser doutro xeito, e fai que o proxecto teña aínda máis atractivo”, afirma o portavoz do equipo.
