A Autoridade Portuaria da Coruña publica hoxe no Boletín Oficial do Estado (BOE) o anuncio de información pública relativo a unha solicitude de TMGA para construír unha nova nave de almacenamento e xestión de mercadorías no porto exterior de Punta Langosteira.

Terminais Marítimos de Galicia continúa así coa súa expansión no recinto portuario. Na actualidade, a empresa conta con dúas concesións, nas que se sitúan naves e elementos auxiliares para o movemento de graneis sólidos e mercadoría xeral, totalizando unha superficie de 45.000 metros cadrados.

Con esta ampliación, a compañía xestionará máis de 50.000 metros, xa que o novo almacén, e o viario anexo que habilitará a propia empresa, suman outros 7.900 metros cadrados de superficie.

Con estas obras, o investimento acumulado de TMGA nas súas instalacións e medios mecánicos no porto exterior elevarase a 35 millóns de euros. Unha parte deste investimento dedicouse ao sistema automático de descarga de graneis sólidos, que entrará en servizo nas próximas semanas despois de varios meses de obras.