O comité de empresa do centro de telemarketing de Atento na Coruña convocou unha xornada de paro o 8 de setembro polo despedimento de cinco compañeiros, segundo informan.

Respecto diso, explican que “en menos dun mes” procedeuse ao despedimento de cinco persoas no servizo de atención telefónica 1002, que presta a atención relativa ao soporte técnico de Movistar. Os cinco eran da quenda de fin de semana.

“Atento cualifica os despedimentos como disciplinarios, baseándoos nun falso baixo rendemento“, sostén o comité de empresa que esixe a súa readmisión e “frear a destrución inxustificada dos postos de traballo”.

Por este motivo, avanzan a convocatoria dun paro de 24 horas o próximo 8 de setembro, ademais dunha concentración, a partir das 12.00 horas, ante o centro de traballo, na rúa Juan Flórez.