O Concello da Coruña ultima unha ordenanza para regular o uso de terrazas por parte da hostalaría en zonas de aparcadoiro, unha medida adoptada en pandemia, segundo informou a alcaldesa, Inés Rey.
A preguntas dos xornalistas, Rey incidiu en que se fixo para minimizar o impacto económico no sector polo contexto do covid “e facilitando que se puidese seguir mantendo a actividade en condicións de seguridade para todos”. “Como medida de emerxencia estaba sometida a unha temporalidade e agora imos reordenar o espazo para poder compatibilizar a actividade económica e compensar o esforzo económico que supuxo a instalación desas terrazas”. “Niso vaise a traballar, nesa ordenanza para telo todo regulado e que todos os usos sexan compatibles“, sentenciou.
EDIFICABILIDADE DA CIDADE DAS TIC
Por outra banda, cuestionada pola edificabilidade permitida nos terreos da Cidade das TIC, indicou que a mesma está recollida no plan xeral de ordenación municipal desde o ano 2013 e que non rexistrou “ningunha variación”.
Sobre un posible novo deseño do espazo por parte do Ministerio de Defensa, dixo que o que se fai desde o mesmo é “un estudo de detalle no que plasma a edificabilidade máxima que hai nesa parcela, pero non significa que se vaia a facer”.
