O Concello da Coruña informou de que a Torre de Hércules pechará este sábado a partir das 17,30 horas pola alerta amarela por vento no litoral coruñés.

Segundo explicaron en redes sociais, o peche baséase na información de Meteogalicia, que notificou unha alerta amarela por ventos de forza 7 a partir das 18,00 horas. Con todo, indican que a pesar de pechar o monumento, a actividade continuará no Centro de Interpretación e Atención ao Visitante.

Tamén debido ao temporal, aprázanse as actividades ao aire libre previstas para este sábado en Seixalbo (Ourense) de Sons e Rúa. Así, a xornada inaugural celebrarase o domingo 3 de setembro ás 12,30 horas no local veciñal (xunto á apertura das exposicións).