O Partido Popular da Coruña proporá a creación do Consello Local de Seguridade para que “os veciños teñan contacto directo coa policía”. Tamén denunciará a falta de mantemento nos barrios polo “deficiente servizo de recollida de lixos” e o “estado lamentable” das vías.

Así o anunciou o portavoz municipal do PP, Miguel Lorenzo, este mércores na presentación das principais iniciativas que levarán os populares ao primeiro pleno do curso político que se celebrará este xoves.

Ademais da inseguridade cidadá, as ocupacións e a falta de mantemento nos barrios, outros asuntos que exporá o PP na sesión a través de mocións ou preguntas serán o “descontrol que existe nos contratos de medioambiente”, os problemas de mobilidade, a “ausencia de orzamento e a falta de execución” do mesmo, así como o atraso nas “grandes infraestruturas”.

“Vou facer unha oposición firme, un traballo rigoroso e sobre todo leal e pensando sempre no benestar da Coruña e dos coruñeses”, apostilou Lorenzo.