Inveravante, fundada en 2007 na Coruña, facturou 270 millóns de euros en 2022, un 52 % máis que o ano anterior. Ademais, o beneficio creceu ata os 17,7 millóns, un 60 % máis. Segundo adianta este mércores Economía Digital, o grupo que preside Felipa Jove rexistra estes resultados debido ao impulso da promoción inmobiliaria (a metade da cifra de negocio), unha corporación que tamén conta con segmentos en hoteis, produtos agroalimentarios selectos e enerxía.
O grupo dos herdeiros de Manuel Jove, falecido en 2020, conta coa filial Avantespacia Inmobiliara, que ingresou 117 millóns o pasado exercicio e obtivo un beneficio de 11,6 millóns. A peche de 2022 contaba con 25 promocións inmobiliarias en Aragón, Andalucía, Asturias, Canarias, Cataluña, Galicia, Madrid, Mallorca e Navarra. Así mesmo, Inveravante conta cun patrimonio neto de 1.364 millóns de euros a peche de 2022. As débedas a longo prazo do grupo descenderon de 285 a 268 millóns.
