A vindeira fin de semana, do 21 ao 24 de setembro, as praias carballesas acollen a Cabreiroá Junior Pro Razo-Caión. Unha proba da Liga Europea Cabreiroa Junior Pro Razo-Caión, na que competirán os 150 mellores surfistas sub20 do continente.

Entre eles teremos varios representantes coruñeses, que aspiran a estar moi arriba. É o caso de Manuel Fernández López (Santa Cristina, Oleiros, 2004). O ano pasado xa quedou de 13º na mesma proba celebrada en Doniños, e o seu palmarés invita a soñar con cotas máis altas. Con 16 anos xa quedou campión galego absoluto e é gañador dos últimos 3 anos Open Galego absoluto; ten gañado varias probas do circuito nacional (en Asturias, Murcia, na Lanzada…), e mesmo ten conseguido o Campionato de Euripa junior coa Selección Española.

Surf na sangue

Manuel empezou con 5 anos, subindo á táboa na praia de Bastiagueiro seguindo os pasos do seu irmán, Juan. Un Juan (1998) que a día de hoxe é unha referencia en materia de ondas grandes a nivel internacional. “Juan empezou cando tiña 9 anos, e eu ía á praia a velo e quixen probar tamén”, explica. “Iamos a Bastiagueiro ao principio, pero tamén ás praias da zona de Arteixo, Barrañán…

Pasaron os tempos e agora, co Bacharelato rematado, e tras pasar un ano sabático (viaxando e surfeando por Sudáfrica, Marruecos, Portugal, Azores…) vén de comezar unha nova aventura: matriculouse nunha Enxeñería na Universidade e Ferrol.

Pero non colgará a táboa, dende logo, e sempre que pode aproveita para visitar as súas praias fetiche.
“Agoras as miñas praias favoritas son as de Razo-Baldaio, pero tamén as da parte de Ferrol, Doniños, Esmelle e Pantín”. O que por agora non lle tira tanto é a rama das ondas xigantes que practica o seu irmán. “De momento non, é un mundo moi diferente, hai que entrenar moito mais físico. Si que me gustan as olas potentes, pero non tanto…”

Referentes e rivais

Recoñece que entre os seus referentes de sempre está o galego de Nigrán Goni Zubarreta, o mellor surfista galego de todos os tempos, “ogallá chegase eu a onda el”. “A nivel estatal, o mellor é Aritz Aramburu, o único que chegou á máxima liga, e a nivel mundial fíxome moito nun brasileiro, Gabriel Medina.

As probas de Razo

“As miñas expectactivas son intentar pasar algunha ronda e estar entre os 15 primeiros, pero hai moitísimo nivel, e igual que pasas dúas roldas como quedar na primeira”, explica.

Ademais, na previa da proba europea, xusto o día 20 hai campionato galego, e os dous primeiros conseguen pase para o evento internacional. Na poba galega junior terá como principais rivais o tamén coruñés Sebastián Baahamonde, o vigués Iván Rod. E cando lle preguntamos sobre os seus rivais principais na categoría absoluta, bromea sinalando ao seu propio irmán: “xa lle gañei no último galego”, sinala entre risas.

Consellos

A todas aquelas familias que están comezando no san mundo das ondas, “aconsellaría non parar de ir durante todo o inverno a Bastiagueiro, onde sempre hai boas ondas para aprender. Tamén hai boas ondas por Arteixo, tes Sabón ou Barrañán, que co porto exterior, cambiou a praia pero veulle mellor ao mundo do surf, xa que se forma unha onda moi boa preto do dique. Por Ferrol, son ondas máis potentes… ao mellor da Esmelle cara o lado dereito, na zona que se chama O Vilar. Pero sobre todo hai que botarlle todas as horas que se poida, e se vai avanzando e mellorando. E o máis importante, vaste enganchando”.