A CIG convocou unha concentración o vindeiro luns, día 9, ás 18.00 horas, diante das instalacións do Club do Mar de San Amaro da Coruña “en repulsa a un novo despedimento e ás actitudes da xunta directiva”. O centro, pola súa banda, alegou “razóns disciplinarias” para acometer esta medida.
Nun comunicado, o sindicato manifesta o seu “rexeitamento frontal” ao despedimento deste empregado que, segundo explica, era delegado de persoal, “membro do recentemente elixido comité de empresa”, cunha “antigüidade de máis de 20 anos e un acordo de redución de xornada para poder desenvolver a súa actividade noutra empresa”. A CIG apunta que con este proceder a xunta directiva da entidade realiza “un novo ataque aos dereitos das persoas traballadoras”. “Van case unha decena de despedimentos en menos de dous anos, dos cales os xudicializados foron gañados e recoñecidos pola xustiza como improcedentes“, engade.
Pola contra, o presidente do Club do Mar, Alberto Santalla, recalcou que “os feitos relatados” por parte da CIG “son completamente falsos, tanto en canto ao número de despedimentos como no resultado final dos mesmos”. “Cabe resaltar que dos seis despedimentos efectuados por causas económicas, produtivas e organizativas, tan só tres foron xudicializados, ditándose a primeira sentenza o pasado venres 29 de setembro, pola que se desestima integramente a demanda da traballadora e confírmase o despedimento ao concorrer as causas alegadas“, explicou. En canto ao traballador delegado sindical despedido, Santalla alegou “razóns disciplinarias, ante as infraccións moi graves por el cometidas”.
