Unha persoa resultou ferida este luns nun accidente de tráfico rexistrado no municipio coruñés de Abegondo, onde chocaron un coche e un camión que transportaba combustible.

Segundo a información do CIAE 112-Galicia, o suceso produciuse sobre as 13.45 horas na A-6. Foi un particular o que informou a emerxencias do accidente, engadindo que podería haber persoas atrapadas.

De inmediato, desde o 112 Galicia solicitouse a intervención de Urxencias Sanitarias de Galicia-061, dos Bombeiros de Betanzos, da Garda Civil, da Policía Local e dos membros de Protección Civil de Abegondo.

Unha vez no punto, os bombeiros informaban ao 112 Galicia de que, por seguridade, foi necesario empregar o material de excarceración para poder acceder á persoa ferida, seguindo as recomendacións dos servizos sanitarios. A vítima foi trasladada ao hospital.