O castelo de San Antón acolleu as pezas arqueolóxicas atopadas nunha escavación de Brandomil, no municipio coruñés de Zas, realizada o pasado mes de xuño. Segundo indica a Deputación da Coruña, os restos atopados nunha leira de Pedra do Altar son materiais cerámicos na súa maioría do século I; pezas puntuais do II, de contexto funerario; e outros pertencentes a unha ocupación esporádica do século IV.
O vicepresidente do organismo provincial, Xosé Regueira, e o alcalde de Zas, Manuel Muiño, foron os encargados de entregar estes restos arqueolóxicos, este venres, acompañados do arqueólogo director, Liño Gorgoso, e do secretario da Fundación Brandomil, Enrique Iglesias. O Castelo de San Antón procederá á “análise” destas pezas para a súa posterior “exposición ou almacenamento”, segundo indica a Deputación da Coruña.
