A Xunta Local de Seguridade da Coruña acordou o reforzo, por parte de efectivos policiais, dos controis en posibles puntos de venda de droga e sobre aqueles inmobles onde se constaten ocupacións ilegais.
Fíxoo nunha reunión, no Palacio Municipal de María Pita, para analizar as últimas medidas postas en marcha desdela Subdelegación do Goberno, en coordinación co Concello. O organismo, presidido pola alcaldesa, Inés Rey, e que contou tamén coa presenza da subdelegada do Goberno, María Rivas, e de mandos da Policía Nacional e da Policía Local, deu conta dos reforzos de coordinación levados a cabo na cidade nos últimos meses.
Así e todo, destacaron un descenso da taxa de criminalidade da cidade, que diminuíu nun 2,5% con respecto ao 2022, se ben aumentaron nun 2% o número de detidos por
infraccións penais.
A XLS puxo en valor o aumento de efectivos: a Policía Nacional na Comisaría da
Coruña conta actualmente con 777 efectivos, o que significa un incremento da súa plantilla nun 5,14% con respecto ao ano 2018.
Con todo, todas as forzas son conscientes da necesidade de profundar en medidas para mellorar “a sensación de seguridade”.
Xunta Local de Seguridade
Na Xunta Local de Seguridade, ademais de Rivas e Rey, tamén estiveron presentes o Comisario Provincial da Policía Nacional en A Coruña, Fernando Martínez, así como representantes da Unidade de Policía Adscrita e da Policía Local, o secretario xeral da Delegación do Goberno en Galicia, Alberto de la Fuente; a concelleira de Interior e atención cidadá, Montserrat Romero; así como Director de Seguridade Cidadá, Carlos García Touriñan.
