A Xunta de Galicia e o Concello da Coruña asinaron un acordo de colaboración para o desenvolvemento de medidas de control do xabaril na cidade.

O acordo, que estará en vigor desde a súa firma ata o 31 de decembro de 2024, establece os deberes que asumen tanto a Vicepresidencia Segunda e Consellería de Medio Ambiente, Territorio e Vivenda como o Concello da Coruña “de cara a aplicar as medidas necesarias para controlar o avance desta especie na contorna urbana e periurbano da cidade”.

Así o informa a Xunta que explica que o Goberno galego encargarase da instalación, cebado, revisión e seguimento das gaiolas trampa. A planificación e seguimento destas actuacións será supervisada en todo momento por persoal da Xefatura Territorial da Vicepresidencia Segunda.

Pola súa banda, a Administración local, ademais de cumprir con todos os deberes necesarios para obter as correspondentes autorizacións por parte da Xunta, comprométese a determinar as localizacións das gaiolas trampa. No caso dos animais capturados, asumirá tanto a súa eutanasia como a xestión posterior dos cadáveres.

A maiores, o Concello executará accións encamiñadas a reducir as condicións de refuxio e encame que ofrece o hábitat para o xabaril naquela terreos competencia da administración local.

No encontro, con presenza do portavoz do goberno local, José Manuel Lage, segundo informa o consistorio, trasladouse, por outra banda, á Xunta que o consistorio chegou a un acordo coa concesionaria da planta de tratamento de residuos para o selado pendente do vertedoiro de Nostián.