Ata 24 vilas galegas saíron a rúa, unha noite máis, para demostrar a súa solidariedade co pobo palestino. Centos de persoas encheron o Obelisco para secundar unha nova mobilización co lema «Paremos o Xenocidio. Galiza con Palestina», convocada polos colectivos  BDS Galiza, Mar de Lumes, Galiza por Palestina emais a Asociación Galaico Árabe Jeni.

“Aquí, a 4000 km da cidade de Gaza, saímos ás rúas porque nos doe Palestina, mais tamén porque, facéndoo, nos negamos a normalizar a barbarie e recoñecemos a nosa responsabilidade”, sinalaba o manifesto.

Con 10.000 vítimas xa no bando palestino, entre eles milleiros de nenos, a sociedade pregúntase que máis é necesario para que a comunidade internacional actúe, medie. “É responsabilidade nosa denunciarmos a complicidade dos nosos gobernos, en particular o goberno español e a Unión Europea, co estado terrorista de Israel, e tamén o vergoñento papel da Xunta de Galiza, que xoga a ser irrelevante para todo e que neste conflito se inhibe de maneira descarada, o que, na práctica, significa poñerse do lado de Israel”, denunciaron os manifestos”.

“Exiximos é o fin do masacre e políticas decididas a terminar de verdade coa ocupación.
Non aceptamos que as accións diplomáticas se limiten a condenar quen resiste e se nega a morrer en silencio, e a pedir a Israel que se comporte. O sionismo xa ten demostrado que non se importa coas regras do mundo, porque se proclama impune: leva violado 62 resolucións das Nacións Unidas até hoxe, sen ter enfrontado nunca consecuencia ningunha.
Tampouco aceptamos a indignante proposta española de conversas de paz para de aquí a 6 meses. En 6 meses o xenocidio perpetrado por Israel terá deixado millares de vítimas mortais máis, e pode moi ben acabar desembocando nunha guerra rexional”.

Propostas

Ofrecen propostas para a sociedade:

• Debemos acudir, como hoxe facemos, ás convocatorias das organizacións de solidariedade. Mais tamén debemos involucrarnos no noso día a día”.
• Podemos boicotear os produtos israelitas que se venden no noso país. É doado atopar empresas, algunhas mundialmente coñecidas, que colaboran abertamente coa ocupación.
• Podemos exixir ás empresas nas que traballamos que paren os seus investimentos e negocios con Israel.
• Podemos exixir ás universidades galegas que cancelen os programas conxuntos coas universidades sionistas, e aos concellos galegos que teñen acordos con Israel feitos pasar como iniciativas culturais que fagan o mesmo.
• Podemos exixir á grande prensa que deixe de equiparar o agresor e o agredido.
• E sobre todo podemos exixir aos nosos gobernos que apliquen contra o estado de Israel e contra os seus líderes as sancións que tan alegremente aplican contra outros estados incómodos por calquera motivo.

Máis mobilizacións

Anuncian que o vindeiro luns 13 haberá novas accións de solidariedade que se presentarán en breve.
Ademais, o día 8, hai cita reivindicativa nas Universidades do país.

MÁIS NOVAS