Despois dun curso pasado cheo de mobilizacións, e tras comprobar e denunciar que a falta de profesorado segue vixente neste comezo de curso, a ANPA O Burgo do Conservatorio Profesional de Música do Concello de Culleredo volverá levar á rúa as súas mobilizacións este venres 10 de novembro. Realizarán unha nova concentración ás 18:00 horas diante do Conservatorio para “reivindicar ensinanzas artísticas de calidade e a cobertura inmediata das prazas de profesorado nas especialidades de frauta e guitarra”.
Así o decidiron as familias na asemblea celebrada o pasado 3 de decembro, pois malia que nos últimos días incorporáronse 3 docentes para a especialidade de piano, está
pendente de incorporación o persoal docente nas especialidades de frauta e guitarra.
As familias seguen sen comprender “como é posible que logo da problemática do anterior curso escolar, o Concello de Culleredo publique a convocatoria para a creación de listaxes de substitución o 29 de maio e demore ata o 2 de outubro a finalización do proceso de selección”.
Consideran tamén “incomprensible que finalizado o dito proceso, se incorpore o persoal especialista de piano o 3 de novembro e estea pendente aínda a incorporación do persoal especialista de frauta e guitarra”.
Lembran ademais que o 18 de setembro solicitamos unha xuntanza á Concelleira de Educación, “pero seguimos sen recibir respostas”.
Novas relacionadas
As familias do Burgo volven ás mobilizacións pola cobertura do profesorado de baixa do Conservatorio
