O Concello da Coruña programará actividades con motivo do Día Internacional da Eliminación da Violencia contra as Mulleres, que se celebra o 25 de novembro. As mesmas desenvolveranse baixo o lema ‘Non máis’, segundo informou a alcaldesa, Inés Rey, nunha comparecencia ante os medios xunto á edil de Benestar Social, Yoya Neira.
“O 25N é unha data fundamental na axenda feminista porque non se pon o foco nas mulleres, senón nas violencias que sofren“, sentenciou. Ademais, dixo que nas actividades programadas a atención ponse nos asasinatos de mulleres, na loita contra a violencia de control entre os mozos e o perigo de banalización de actitudes machistas. En canto ás actividades, explicou que o acto principal será un debate ao redor da película ‘Douche os meus ollos’, no seu 20 aniversario. Ao coloquio, asistirá o seu protagonista, o actor galego Luís Tosar.
