A Coruña contará este ano con máis de tres millóns de puntos de luz de Nadal, que se iluminarán a partir do próximo venres 1 de decembro, nun acto que terá lugar no Obelisco.
Haberá nos diferentes barrios e distritos 560 arcos luminosos e toda a iluminación será de baixo consumo, precisa o consistorio nun comunicado.
O acto, que terá lugar no Obelisco,estará presidido pola alcaldesa, Inés Rey, que destaca a importancia de que “o Nadal se viva coa mesma ilusión e intensidade nos diferentes barrios da cidade”.
As luces distribuiranse por diferentes rúas dos barrios e primarán os espazos comerciais abertos para fomentar as súas vendas. Ademais, A Coruña volverá contar coa gran esfera luminosa de 12 metros de altura da Mariña (xa está instalada) e coa árbore de 20 metros de altura do Obelisco.
O 1 de decembro o acto de aceso comezará ás 18,30 horas. Previamente, haberá animación infantil no Obelisco e, para finalizar, unha actuación de Sisters in the House. Ademais, o mesmo día comezarán tamén as actividades de Nadal da praza de María Pita, que inclúen este ano unha pista de xeo, aberta ata o 7 de xaneiro.
