O secretario xeral do PSdeG, Valentín González Formoso, presentou este sábado aos candidatos e candidatas socialistas da comarca da Coruña como “alicerces da protección social, o emprego e o dinamismo económico de Galicia”.
Así o trasladou na presentación dos candidatos e candidatas do PSdeG na comarca da Coruña, que se celebrou en Oleiros coa presenza do portavoz do PSOE no Congreso, Patxi López.
Formoso subliñou que os socialistas galegos poñen á fronte das candidaturas “aos mellores nomes de homes e mulleres de ideoloxía socialdemócrata centrada” para liderar os concellos que son, dixo, a “referencia política” da vida da cidadanía.
Por iso, afirmou, os socialistas galegos sitúan “aos mellores candidatos como referentes das alcaldías, para que a xente perciba que sen o PSOE o mundo municipal é moito peor”.
En declaracións aos medios, puxo a área metropolitana da Coruña exemplo do “impulso” do socialismo á fronte dos concellos, coa “gran bandeira” que representa a cidade coruñesa, que conta coa socialista Inés Rey “como a primeira alcaldesa da historia da cidade”, e que ten “a gran fortaleza de recuperar o orgullo” da mesma.
