InicioOPINIÓNAperta coruñenta, Xornal da Coruña!

Aperta coruñenta, Xornal da Coruña!

Publicada o

Por Xurxo Souto

Aperta Coruñenta!

Moreniña por te ver
pasei o mar da Marola
a piques de me perder.

Velaí a apoteose do cancioneiro tradicional coruñés. Tríade céltica –como diría don Manuel Murguía- na forma. E unha mensaxe definitiva no fondo: Cómpre arriscalo todo para acadar a beleza. Esta é a esencia do ser coruñés.

Xornal da Coruña! quero saudar a túa chegada cunha apoloxía da cidade que nos habita: Luz e vento. Unha pedra chantada no Atlántico. E a Torre, ese xigante, entre as Mariñas e a Costa da Morte, facho acendido para abrir camiños no Océano. Ou o que é o mesmo, para abrir camiños en todos os misterios.

Xornal da Coruña, palabra grande. Agromas cheo de luz na cidade-barco para amosarnos os seus universos invisíbeis. Cando subimos á Torre, os terricolas enchemos o ollo cunha vista marabillosa. A xente do mar está vendo moito máis. As pedras onde traballa o percebeiro: a Rabadeira, a enseada do Xogadoiro, o Gueivouteiro, o Xanrei, as illas do Boi , da Vaca do Becerro e do Becerriño.

Debaixo da tona da auga latexa a fartura dos bancos pesqueiros. Velaí están as Acentes, o Carpancho, os Abarracidos, as Tousas de Leste, as Tousas de Vendaval….Alén de Prior, as pedras dos Cabalos, e os camiños que levan ao Gran Sol, o mar de Irlanda.
Ruído, fume, cemento…a pátina urbana tolda ás veces a nosa percepción, e non nos permite sentir as magnitudes cósmicas –pedra, mar, vento- entre as que armamos a nosa vida.

A Coruña, “Nao Enfeitizada” –dixo Devesa Monterroso- e nós dentro, aquí, en concreto, onde xermola a cada instante a marabilla. Milagre cotián que estoupa nos beizos cada vez que pronunciamos a palabra máxica: Orzán !

Os catro relampos da Torre identifican á Coruña entre todos os navegantes. Ritmo de luz baixo o que medramos: Monte-Alto, os Mallos, os Castros, Labañou…barrios cargados de historias humildes -marabillosas- que agora, co Xornal da Coruña, van converterse, por fin, en protagonistas.

Grazas, de entrada, por tanta luz. E as máis felices singraduras. Velaí vai, chea de forza, a miña aperta coruñenta !
Ai! Moreniña por te ver…

  • Xurxo Souto. Dinamizador cultural eterno da vila da Coruña. Membro fundador dos Diplomáticos e do Rock Bravú, actual cantante da Banda de Shanghai, locutor de radio, escritor, contador, guía turístico e espiritual… Enciclopedia viva da Coruña.

ÚLTIMAS

A Coruña, provincia onde os pequenos concellos de interior votan de xeito conservador mentres a costa se moderniza

Galicia é diversa. A nosa terra é un territorio onde nada ten que ver a...

A Xunta presenta unha oferta por 35.000 euros para adquirir os murais de Lugrís da rúa Olmos da Coruña

Despois da polémica xerada entre a sociedade civil pola posta en venda dos murais...

O tempo descafeinou O Gran Camiño

Mágoa o temporal desta mañá que agriou a celebración de O Gran Camiño na...

A AMEGA descobre a historia dos medios en galego da cidade

Ademais do Festival de Música Galega contemporánea deste xoves, e para o que xa...

DEIXAR UN COMENTARIO

Please enter your comment!
Please enter your name here