O martes 16 de maio, víspera do Día das Letras Galegas, terá lugar a presentación na Coruña do Festival Vibra Balboa, será na Sala Garufa Club coas actuacións dos grupos De Ninghures, Covagueira e as foliadas da man dos do Xalo e Pandeireperras.
O festival Vibra Balboa naceu en 2012 impulsado polos/as integrantes do grupo de música coruñés Chotokoeu que, tras actuar en Balboa, namoraron desta vila do Bierzo e decidiron crear alí un encontro cultural internacional en plena natureza, entre “Pallozas”, ríos e montañas.
Para celebrar o seu regreso na que será a 6ª edición, organizan unha festa de presentación coincidindo coas Letras Galegas, nunha noite de folk e música tradicional, propostas pouco habituais nas salas de música coruñesas e que reivindican o seu espazo na escena musical e cultural da cidade.
A partir das 22:00 poderemos desfrutar das actuacións de “De Ninghures” un dos grupos referentes do “novo folk galego” e de Covagueira, grupo nacido na famosa Escola de Gaitas de Ortigueira cunha potente proposta de folk instrumental, ademais, haberá varios momentos para a “foliada” coas agrupacións “Os do Xalo” e “Pandeireperras”, que aseguran unha noite chea de bailes e festa, nunha das emblemáticas salas de música da Coruña.
